lo nenri be lo spati denmi
By la .akutagaun.riunosuk. e la .guskant.
liste be lo'i se cukta
* cukta pilka
* liste be lo'i se cukta
* notci lo nu fanva
+ nu lo fanva cu ckire
* lo nenri be lo spati denmi
+ lisri fi lo poi lo pulji cu te preti fo ke'a ku'o tricu katna
se jibri
o pixra be lo xirma sfani
+ lisri fi lo poi lo pulji cu te preti fo ke'a ku'o litru
jdaca'i
o pixra be lo spesi'u
+ lisri fi lo poi lo pulji cu te preti fo ke'a ku'o se fraxu
o pixra be la .tajomar.
+ lisri fi lo poi lo pulji cu te preti fo ke'a ku'o laldyni'u
o pixra be la .masag.
+ la .tajomar. tavla fi lo vo'a zekri
+ lo poi lo no'u la .ki,iomiz. malsi cu se klama ke'a ku'o ninmu
cu tavla fi lo se zungi be ko'a
+ lisri se pi'o lo pruxi bo ve cusku je ninmu moklu fi le morsi
pruxi
* vlaste
+ pixra be lo spatrsasa
+ pixra be lo spatrtake
* notci lo se fanva
ni'o ni'o ni'o
notci lo nu fanva
kei de'i li re no pa re pi'e pa re pi'e pa
fi lo fanva no'u la .guskant.
ni'o ni'o
nu lo fanva cu ckire
.i
mi ckire la .tijlan. .e la .junpen. .e la .iocikun.juj. lo nu vo'e te
pinka lo mi xe fanva gi'e dunda lo dirba sidbo poi sidju mi lo nu fanva
ni'o ni'o
bangu
.i dei cukta ja'i py. goi lo favytcini pa pi pa moi be la'i prane ke
lojbo bangu
.i ku'i lo cmavo cu se smuni ma'i lo ca se stidi be la baupla fuzykamni
.i se ki'u bo ra'u lo gadri .e zo vi .e zo va .e zo vu frica tu'a py.
lo ka smuni
.i lo bangu fa'u gugde fu'ivla cu cmima lo'i la'o ly. ISO 639 ly. bangu
fu'ivla ku fa'u lo'i la'o ly. ISO 3166 ly. gugde fu'ivla
.i ji'a lo xe fanva cu se pagbu lo cipra bo cmavo ja nalmorsi bo gismu
noi ke'a se notci fi mi
ni'o ni'o ni'o
lo nenri be lo spati denmi
fi'e la .akutagaun.riunosuk.
sei la .guskant. fanva je te pixra
ni'o ni'o
lisri fi lo poi lo pulji cu te preti fo ke'a ku'o tricu katna se jibri
ni'o
la'e po do di'u jetnu
.i
lo pu co'a sanji be lo de'u morsi xadni cu me mi je'u
.i
mi ta'e ca ji'a lo zi cerni te zu'e lo nu katna lebna lo trixe cmana
ckunrsugi cu klama pu ki
.i ce'o .ua
ne'i lo cmana ctino spati bo denmi lo de'u morsi xadni cu zvati
.i
pau pei zvati ma kau
.i
la'a ri lo la .iamacinan. dargu va lo li sa'e nai vo bi'i mu gutcrtco
cu darno
.i
sei ne'i loi spatrtake loi cinla ckunrsugi fe'e ru'i nai zvati se'u
stuzi lo nu tu'a no prenu cu se ganse
ni'o
lo morsi xadni
joi gi lo blanrxanada crekrsuikanu .e lo tcadu bo morna je cinje
mapkrxeboci ca'o dasni
gi gapru be fa lo betfu be'o vreta
.i ru'a
sei ku'i pa po'o mei dakfu
lo cutne midju cu se tunta je se xrani
.i se ri'a bo
loi pe ru'u lo morsi xadni ku spatrtake farlu bo pezli cu nuknrsuxo
cinta jinru pe'a
.i
na'i lo ciblu ba'o rinci
.i
lo xrani moklu pe'a ji'a ca'a sudga za'a
.i ji'a ba'a nai
bu'u ri lo xirma sfani noi pa mei gi'e pe'a na tirna lo mi cadzu sance
ji'a ku'o
tai'i .betar. ca'o snipa je batci
ni'o
pau pei xu kau lo barda dakfu .a lo simsa na se viska
.i
na'i no da zvati
.i ku'i
bu'u lo pe ne'a ta ckunrsugi genja jibni lo skori cu pa mei je vreta
.i ji'a
sei sa'a ze'i smaji se'u
ba'a nai bu'o lo na'e skori no'u ji'a lo komcu cu pa mei je zvati
.i
loi zvati be ne'a lo morsi xadni cu po'o me ri .e ra vu'o noi re mei
.i ku'i
loi srasu .a loi spatrtake farlu bo pezli fe'e ru'i vi'a se stapa je se
daspo ba'o
.i se ki'u bo ju'o
le nanmu pu'o lo mu'e se catra cu mutce carmi tolcando
.i
ki'a pau pei xu kau lo xirma na zvati
.i
ta je'u lo'e xirma na'e ka'e se nenri
.i ri'a bo ru'a
fe ta fi lo xirma klama dargu fa lo spati denmi pa mei cu bitmu
xirma sfani
ni'o ni'o
lisri fi lo poi lo pulji cu te preti fo ke'a ku'o litru jdaca'i
ni'o jo'a
pu ki penmi lo nanmu pe lo de'u morsi xadni ca lo prulamdei
.i
prulamdei
sei sa'a ze'i smaji se'u
ju'o cu'i ke donri midju sa'e nai la'a
.i
se stuzi da po'e la .seki,iaman. bi'o la .iamacinan.
.i
le nanmu ku jo'u le ninmu poi se marce lo xirma ku'o mo'i zo'i cadzu
klama fa'a la .seki,iaman.
.i
le ninmu cu se gacri lo bukprmuci
.i se ri'a bo
tu'a lo flira na se ganse mi
.i
lo se viska cu po'o ke zirprxagi senta ke'e za'a bukpu skari
.i
lo xirma cu skari kandi
sei sa'a ze'i smaji se'u
gi'e ju'o cu'i katna cnici kerfa za'a xirma
.i
xu preti lo ni rajycla
.i
lo ni rajycla ku gutcrki li li'o vo so'i xu
.i sei sa'a ze'i smaji
ro bu'a zo'u se gu bu'a
gi mi budjo cilre
.i se ki'u bo
na satci djuno tu'a ra
.i
le nanmu
sei sa'a ze'i smaji se'u
na'i cu dasni lo barda dakfu .e ji'a lo bagyce'a jo'u celga'a
.i ra'u
nau ca ji'a sai satci morji lo du'u lo xekri cinta tubnu gau vasru za'u
re no jamna celga'a
ni'o
ca'o ba'e na'e se xanri ji'a lo nu le nanmu ba binxo ti
.i ku'i jo'a
lo'e prenu nu jmive cu ju'o simsa be lo djacu bo dirgo ja lindi
.i .uu sai
sei no da ka'e se cusku se'u kecti cuntu co'i
spesi'u
ni'o ni'o
lisri fi lo poi lo pulji cu te preti fo ke'a ku'o se fraxu
ni'o
pau pei lo nanmu poi mi kavbu ke'a ku'o goi ko'a mo kau
.i
ko'a jo'a du la .tajomar. noi misno ke zekri lebna
.i ku'i
pu ki ca lo mu'e mi kavbu ku
sei la'a za'a ko'a fi lo xirma ba'o farlu
bu'u lo la .a,uadagutc. rokci cripu cpana ku
ki'ai .un,un. cmoni ca'o
.i
pau pei ma kau tcika
.i
lo tcika zo'u sa'e nai prulamcte ke pa moi ctetcika
.i
pu za ku ca lo mu'e mi kavbu fliba ku ji'a
ko'a lo vi blanrkonu crekrsuikanu ku jo'u lo jinme darxi punli jadni ke
barda dakfu cu dasni
.i ku'i
nau ca ku lo ri drata ji'a no'u sei je'u do viska lo'e bagyce'a jo'u
celga'a ku ji'a sai se ralte
.i .ua jo'a pei
lo pu se ralte be lo nanmu pe lo de'u morsi xadni be'o ku ji'a co'e
sei sa'a ze'i smaji se'u
.i se ki'u bo
ju'o lo pu ca'a prenu catra cu du ko'a no'u la .tajomar.
.i
lo bagyce'a poi lo skapi cu sarlu vasru ke'a ku'o jo'u lo xekri cinta
tubnu ku jo'u lo cipnrtaka pimlu ke jamna celga'a pa ze mei ku
sei sa'a ze'i smaji se'u
vu'o no'u ro ke'a le nanmu cu ju'o se ralte pu
.i jo'a
lo xirma goi ko'e ji'a sei je'u do cusku ga'i nai se'u ke katna cnici
se kerfa ke'e je ke skari kandi
.i
ko'a fi ko'e no'u lo di'u danlu ga'i bai vo'i farlu
.i ju'o
la'e di'u da re'e zei jalge
.i
ko'e vi ze'o lo rokci cripu va'o lo nu fe lo clani skori cu te lasna
kei lo dargu mlana ke crino srasrsusuki ca'o citka
ni'o
ko'a no'u la .tajomar. ga'i verai lo'i zekri lebna poi ne'i la
.rakutcun. mo'i zei zvati ku'o nelci be lo'e ninmu
.i
lo nu ca lo prulamna'a critu bu'u lo cmana be ti'a lo no'u la .binzur.
vi'u pixra po lo no'u la .torib. malsi
lo catni ninmu pa mei poi la'a lijda vitke ku'o jo'u lo nixli ba'o se
catra kei
cu ti'e sa'e cu'i jalge zu'e ko'a ga'i
.i
lo de'u ninmu poi se marce lo skari kandi ku'o ji'a
ni'i lo nu ru'a ba'e ko'a ga'i le nanmu pu catra ku
fa'a zo'e co'e .ia cu'i
.i
sei mi du'e mei cusku se'u ku'i
la'e di'u ji'a ko se lanli ga'i nai .e'u
ni'o ni'o
lisri fi lo poi lo pulji cu te preti fo ke'a ku'o laldyni'u
ni'o
jo'a lo de'u morsi xadni zo'u tixnu be mi speni nanmu
.i ku'i
na'e tcadu prenu
.i
sonci tu'a lo la .uakas. gugde jimca
.i
se cmene lu kanaza,uan.takexir. li'u gi'e nanca li re xa pu
.i na'i
xendo ckaji
.i se ki'u bo ju'o
ba'e na se xebni
ni'o
xu preti le tixnu
.i
le tixnu cu se cmene zo .masag. gi'e ca ze'a pu nanca li pa so
.i
ra menli tsali ninmu na'e mau lo'e nanmu ku za'a gi'e ku'i
no roi speni lo poi na du la .takexir. ku'o nanmu
.i
lo flira cu skari ke kandi xekri gi'e se barna se di'o lo zunle kanla
zunle gi'e cmalu je tamsmi be lo guzme grute
ni'o
la .takexir. sei prulamdei se'u joi le tixnu co'a klama la .uakas.
.i ku'i
sei ti co'i cuntu se'u
jalge re'e ma pau nai
.i ku'i
le tixnu pu co'i mo
sei tu'a lo speni nanmu co'u se pacna se'u ku'i
sei lo nu nei kau ra'u po'o cu se xanka sai
.i e'o sai ko
sei mi noi laldyni'u cu pi ro mei nunji'e pikci
mo'i ne'i jbini da'i lo'i srasu ja tricu se gi'u sisku ga'i nai tu'a lo
se klama be le tixnu
.i
ro bu'a zo'u se gu bu'a gi
lo se xebni cu du lo ga'i de'u zekri lebna poi se cmene zo .tajomar. .a
zo'e
.i
le speni nanmu ku po'o nai .e ji'a sai le tixnu ge'e
sei sa'a co'a za'i klaku bo condi je valsi bo no mei
ni'o ni'o
la .tajomar. tavla fi lo vo'a zekri
ni'o
lo catra be le nanmu goi ko'a cu du mi
.i ku'i
le ninmu goi ko'e zo'u mi na'e catra
.i ja'o
ma se klama pu
.i
lo du'u go'i kau na se djuno mi ji'a
.i .e'u
ko denpa de'e to'u nai
.i
se gu so'i za'u mei vlile co preti
gi .ei lo na se djuno na ka'e se cusku
.i ji'a
mi poi ca'o se cuntu ti
na .ai tolvri .io nai mipri
ni'o
ba zi lo puvlamdei dormidju mi penmi le spesi'u
.i
sei ca lo mu'e go'i ku brife
lo bukprmuci cu se lafti
.i se ri'a bo
ze'i ku lo ko'e flira cu se viska
.i
zo ze'i zo'u
sei sa'a ze'i smaji se'u
va'i ca lo mu'e viska sanji ku co'u viska
.i
sei pe'i lo nu go'i ku pa mei krinu
ga'a mi lo ko'e flira cu simsa tu'a lo ninmu censa
.i
mi ca ze'i lo mu'e go'i ku jdice
lo du'u se gu catra ko'a gi .ai lebna ko'e
ni'o fu'i
lo nu catra lo nanmu
cu na'e ke vajni be ma'i ro do cuntu
.i do'a
ga nai lebna lo ninmu gi .ei lo nanmu cu se catra
.i ku'i zu'u
mi ca lo mu'e catra ku pilno lo xadmidju barda bo dakfu
.i zu'unai ju'a
ro do catra fi genai lo barda dakfu gi ga lo ka catni gi ga lo jdini gi
sei zo'e se jalge
lo xendo tcica valsi po'o ji'a
.i jo'a
ge lo ciblu na rinci gi lo nanmu ca'o prane jmive
sei sa'a ze'i smaji se'u
.i je ku'i
co'i catra je'u ri
.i
sei pensi be lo ni zekri se'u
na birti lo du'u ro do ji kau mi palci
sei sa'a ranxi cisma
ni'o ku'i
ga nai va'o lo nu na catra ko'a ku pu'i lebna ko'e gi ju'a no da claxu
.i na'i
sei ca ta menli
jdice lo du'u .ai ge sei traji cumki na catra ko'a gi lebna ko'e
.i ku'i
ba'e bu'u ta no'u lo la .iamacnan. ralju dargu na ju'o ka'e zukte la'e
di'u
.i se ki'u bo
mi pu ki zukte lo mapti .a'i lo nu le spesi'u gau kansa mi mo'i ne'i lo
cmana foldi
ni'o
la'e di'u ji'a na'e nandu
.i
mi co'a kansa le spesi'u lo nu dargu klama
.i ce'o tu'e
lo laldo mrostu cu zvati lo va cmana
.i
mi pu kakpa fi ra no'u lo laldo mrostu
.i ja'e bo .ua
pu kakpa so'i minra ja barda bo dakfu
.i
mi te zu'e lo nu no da djuno lo du'u go'i ku ku
pu derse'a lo di'u dacti lo cmana ctino spati bo denmi nenri
.i
ga nai su'o da djica gi vecnu .au lu'a zu'i da li so'u
sei sa'a ze'i smaji se'u
tu'u
.i di'u lisri fi mi
.i
ko'a za ba co'a zenba se cinri lo mi lisri
.i ce'o
sei sa'a ze'i smaji se'u
.ue nai .o'a
sei lo si'o djica cu se terpa na'i pei pau nai se'u
ba me'i pa cacra
le spesi'u fi'o se kansa mi co'a jai gau farna jo'a fai lo cmana dargu
lo xirma
ni'o
mi ce'o gi co'u klama mo'i re'o lo spati denmi
gi cusku lo se du'u ge derse'a lo dirba lo ti nenri gi ko'oi mo'i zo'i
viska se ce'o klama
.i
ko'a djica je taske pe'a
.i se ki'u bo .ei
no da se pante
.i ku'i
ko'e sei vo'a lo xirma na do'a nai de'a se marce se'u
cusku je'u lo se du'u .ai denpa
.i ji'a
sei viska be le za'i lo spati cu mutce denmi se'u
.ue nai nu cusku di'u
.i ji'a je'u
mi pu platu je pacna lo nu sa'e go'i
.i ja'e bo
va'o lo nu cliva ko'e noi pa mei ku
mi joi ko'a klama mo'i ne'i lo spati denmi
ni'o
lo spati denmi zo'u ve'a spatrtake po'o
.i ku'i
ca'u va fi'u re gutcrtco loi ckunrsugi co no'e denmi cu zvati
sei sa'a ze'i smaji se'u
.i
te zu'e lo nu snada lo mi te gunka kei no stuzi se mau ti mapti
.i
ca'o lo zu'o catke je seirgau loi spati denmi kei
mi cusku lo se du'u derse'a lo dirba lo ckunrsugi cnita kei
noi jetnu simlu jitfa
.i
ko'a noi ba'o te cusku di'u mi ku'o
mo'i ca'u klama co troci mutce
fa'a lo cinla ckunrsugi poi pa'o se viska
.i
za ba ku joi gi lo spatrtake co'a to'e denmi gi lo ckunrsugi cu so'i
mei je porsi
sei sa'a ze'i smaji se'u
.i
mi co'i ja pu'o lo mu'e mo'u klama ta ku suksa falgau je jgari bo catke
ko'a mo'i ni'a
.i
ko'a ji'a mutce tsali za'a lo bapli ni'i lo nu vo'a dasni lo barda
dakfu
gi'e ku'i
kakne no da ba'e lo nu suksa
.i
ba zi ku ko'a ce lo pa mei ckunrsugi genja jibni cu se bakfu
.i
xu preti lo skori
.i
da poi skori zo'u sei ckire be fi lo ka ce'u zekri lebna
mu'i lo nu na'e djuno lo du'u ba'a ca ma kau nitcu gapru bo ragve lo
bitmu
ca'a dasni da di'o lo xadmidju
.i .ei
te zu'e lo nu gau na'e bacru ku
loi spatrtake farlu bo pezli gau denmi nenri lo ko'a moklu .i ja'e bo
drata raktu no mei
ni'o
mi va'o lo nu tu'a ko'a gau mulno ku
ca za'u re'u klama fa'a ko'e te zu'e lo nu cusku lo se du'u ki'u gi
ko'a co'a suksa bilma za'a gi ko'e ko'oi zo'i viska se ce'o klama
.i
la'e di'u ji'a se jalge lo se pacna vau sei cusku na'e sarcu
.i
ko'e noi stali lo za'i to'e dasni lo mapkrtcime
gi'e se jgari mi fo lo xance ku'o
mo'i zo'i klama lo spati denmi condi
.i ku'i
sei ko'e ta klama ce'o viska
ko'a ce lo ckunrsugi genja jibni cu se bakfu
sei sa'a ze'i smaji se'u
.i
ko'e ca lo mu'e pa roi viska lo za'i go'i ku ku
sei ca ma gau bartu be lo daski se'u
tai'i kirarit. to'e setca lo cmalu dakfu
.i
mi nau ca ze'e pu no roi viska lo ninmu poi cinmo carmi se du'i ko'e
.i
ga nai da'i no'e jundi ca lo mu'e go'e gi ju'o pa mei se tunta di'o lo
mlana betfu
.i na'i
se gu bandu lo xadni gi ca'o lo nu junri balre bo se gunta ku pi du'e
mei se xrani nu'o
.i ku'i
mi no'u la .tajomar. .io ru'a
va'o lo za'i a'i na ji'a to'e setca lo barda dakfu kei
du'e re'u darxi falgau lo cmalu dakfu
.i
ko'e poi za'u so'i mei cinmo bo tsali ninmu ku'o ku'i
se cau lo xarci no da kakne
.i
mi du'e re'u ku
te tai lo se pacna ku
ge nai catra ko'a gi lebna ko'e pu'i .uo
ni'o
ge nai catra ko'a gi co'e
sei sa'a ze'i smaji se'u
.i jo'a
mi be'u nai na zukte fi lo nu catra ko'a
.i ku'i
pu'o lo nu
ge cliva ko'e noi klaku je cnita bo farna gi
rivbi klama to'o lo spati denmi kei
ko'e suksa tsali bo jgari lo mi birka te tai pe'a lo si'o fenki
.i ji'a
sei fe lo ru'i nai se krixa cu tirna lu
do .onai ko'oi lo mi speni co'a morsi
.i
lo nu .oi re nanmu cu viska lo mi se ckeji cu se dunku semau lo nu mi
co'a morsi
li'u se cusku ko'e
.i na'i lu
mi kansa .ai pa lu'a do ce ko'a vu'o poi jmive je renvi nanmu
sei sa'a ze'i smaji se'u
li'u ji'a carmi vasxu se cusku ko'e
.i
mi ca lo mu'e go'i ku co'a vlile carmi djica lo nu catra ko'a
sei sa'a badri ke carmi cinmo
ni'o
sei mi di'u cusku
do jinvi ju'o lo du'u mi zmadu ro do lo ka ce'u kusru
.i ku'i
lo nu go'i cu se krinu ba'e lo nu do na viska lo ko'e flira .a lo ra'u
pe ca ze'i lo mu'e go'a ku jelca pe'a kanla
.i
mi ca lo mu'e mi catlu ko'e soi mi se di'o lo kanla
cu djica lo nu se gu mi se ke lindi joi catra gi .au mi co'a speni ko'e
.i
.au mi co'a speni ko'e
sei sa'a ze'i smaji se'u
.i
lo mi menli cu se culno lo nu go'i po'o
.i
lo nu go'i ku na'e ke to'e nobli si'o cinse djica kei be ma'i ro do
.i
ga nai da'i ca ra no drata be lo si'o cinse djica cu culno mi
gi mi se gu tikpa je falgau ko'e gi .ei rivbi cliva co'i
.i
ko'a ji'a va'o lo nu go'i da'i ku nu'o na'e nipygau lo ko'a ciblu lo mi
barda dakfu
.i ku'i
ne'i lo kandi manku spati bo denmi ca ze'i lo mu'e ci'oi .djit. catlu
lo ko'e flira kei
mi jdice lo du'u ga catra ko'a gi nai cliva ti
ni'o ku'i
mi catra ko'a ta'i lo na'e .ai tolvu'e
.i
mi jai gau kluza fai lo ko'a skori gi'e cusku lo se du'u ko'oi barda
dakfu damba
to lo vreta be lo ckunrsugi genja jibni cu du le skori poi ca lo nu
go'i ku festi cliva .o'i nai ke'a toi
.i
ko'a sei lo flira lo ganse ba'o cenba se'u
to'e setca lo ganra barda bo dakfu
.i ce'o sei fe no da bacru se'u
fengu je suksa bo gunta mi
.i
sei sa'a ze'i smaji se'u
na'e ju'o se sarcu lo nu cusku
lo se du'u ma kau jalge le nu barda dakfu damba
.i
sei re ci re'u gunta lo mi barda dakfu cu tunta lo ko'a cutne
.i
lu re ci re'u gunta li'u
sei sa'a ze'i smaji se'u
.i
ko na .e'o tolmo'i di'u
.i
mi nau ca ji'a zanru la'e de'u po'o
.i ki'u bo
lo za'u re no roi dakfu gunta be mi cu me ko'a je pa mei po'o
sei sa'a pluka cisma
ni'o
mi ca lo mu'e ko'a co'i farlu ku nitygau lo ciblu cinta dakfu gi'e ti'a
viska fa'a ko'e
.i .za'a
sei sa'a ze'i smaji se'u
sei mo pau nai
ko'e zvati no da .ue sai
.i
sei ko'e fa'a ma kau rivbi cliva
mi sisku a'i fi lo'i jbini be lo'i ckunrsugi
.i ku'i
bu'u lo cpana be loi spatrtake farlu bo pezli cu cliva no lo'e pu co'e
.i ji'a
sei .a'a tirna ku'i
lo se tirna cu po'o nu ca co'a morsi kei sance lo ko'a galxe
ni'o la'a
ko'e rivbi cliva pa'o loi spati denmi co'a ja pu'o lo nu mi barda dakfu
damba ku te zu'e lo nu cpedu lo nu da sidju
sei sa'a ze'i smaji se'u
.i
mi sei fe lo nu go'i ku pensi
ca ku ki'u tu'a lo mi nunji'e
ba zi lo mu'e lebna lo barda dakfu ku jo'u lo bagyce'a jo'u celga'a
cu xrukla lo da'u cmana dargu
.i
bu'u ri lo ko'e xirma za'o smaji citka loi srasu
.i
lo nu da'i ciksi lo cuntu pe ba lo nu go'i cu po'o ju'o na'e sarcu
.i ku'i
pu lo nu nenri lo tcadu kei
co'u ponse lo po'o barda dakfu
sei sa'a ze'i smaji se'u
.i ki
lo mi zekri se cusku cu se jimte di'u po'o
.i
ro bu'a zo'u se gu bu'a gi .ei pe'i lo mi stedu cu pa roi dandu lo
tricrxotci lo jimca galtu
.i se ki'u bo .e'i nai sai ko sfasa mi fo lo traji
sei sa'a za'i jgira
ni'o ni'o
lo poi lo no'u la .ki,iomiz. malsi cu se klama ke'a ku'o ninmu cu tavla fi lo se
zungi be ko'a
ni'o
sei sa'a ze'i smaji se'u
le blanrkonu crekrsuikanu dasni nanmu goi ko'a
noi ba'o bai gletu mi ku'o
ca'o lo nu viska le mi spenau goi ko'e poi skori rinju
pu ki cmila te tai lo si'o ckasu
.i
.ei ko'e la'u li xo pau nai cu xenru
.i ku'i
se gu so'i za'u mei troci lo nu tolcando
gi po'o lo skori linji cu za'u mei tai'i xic.xic. danre tunta
.i
mi sei rarna mo'i fa'a ko'e bajra se tai lo gunro
.i na'i
go'i .ai
.i ku'i
ko'a zi mo'i ni'a tikpa je falgau mi
.i
ca sa'e lo mu'e go'i ku
mi co'a sanji lo nu ne'i lo kanla be ko'e lo carmi poi no da ka'e ve
skicu ke'a xabju pe'a
.i
no da ka'e ve skicu
.i
sei sa'a ze'i smaji se'u
mi bai lo ka morji tu'a le kanla kei
nau ca ji'a sai co'a se xadni co slilu
.i
ko'e poi le ke'a moklu do'a nai ba'e no valsi ka'e jai se pi'o bacru
ku'o
tavla fi pi ro cinmo zu'i pe ne'i lo zi kanla
.i ku'i
lo va carmi cu na'e ka fengu kei je na'e ka badri kei
sei sa'a ze'i smaji se'u
je po'o je'a lenku bo gusni vau ju'a
.i
ri'a lo nu genai se tikpa ko'a gi se darxi pe'a le kanla skari kei
mi krixa po'o da sei mi na jimpe
.i ce'o ro mai de'a sanji
ni'o ba za ku du'e re'u di'a sanji
.i je za'a
ko'a pe lo blanrkonu crekrsuikanu ba'o cliva co klama da
.i
lo se cliva zo'u nu po'o bu'u lo ckunrsugi genja jibni ko'e skori rinju
.i
mi ba'o a'i zei rajgau lo mi xadni bu'u lo spatrtake farlu bo pezli
cpana
gi'e zgana ko'e sedi'o lo flira
.i ku'i
lo ko'e kanla skari cu ba'e no mei frica zu'i pe pu za
.i
ru'i ku bu'u lo lenku to'e sinma loldi lo ka xebni skari cu se jarco
.i
zo ckeji zo badri zo fengu
sei sa'a ze'i smaji se'u
.i
nau na djuno lo du'u lo za se cinmo be mi cu .ei se jufra ma kau
.i
mi tai'i .ioro,ior. co'a ruble sanli gi'e klama mo'i fa'a ko'e
.i lu
doi
.i
va'o lo nu ca ba'o co'e
na ka'e kansa ga'i nai do
.i
mi .u'o zi co'a morsi .ai sai
.i ku'i
sei sa'a ze'i smaji se'u
ku'i ko ji'a co'a morsi ga'i nai .e'o
.i
do viska ga'i nai lo se ckeji be mi
.i
mi na zanru lo nu cliva do po'o noi pa mei
li'u
ni'o
mi .a'i sai cusku di'u po'o
.i ku'i
ko'e noi za'a to'e jundi ku'o catlu po'o ju'a mi
.i
mi joi gi se rinju lo cutne poi pu'o spoja
gi sisku tu'a lo barda dakfu po ko'e
.i ku'i
sei la'a ko'a poi zekri lebna ba'o lebna .oi
lo barda dakfu po'o nai .e ji'a sai lo bagyce'a jo'u celga'a cu na'e se
tolcri ne'i lo spati denmi
.i ku'i va'u lo nu nei ku
lo cmalu dakfu po'o ca'o vreta ne'a lo mi jamfu
.i
mi sei fe le cmalu dakfu mo'i ga'u jgari
za'u re'u cusku di'e ko'e
.i lu
ju'a ko te lebna lo ga'i nai nu jmive
.i
mi ji'a ba zi co'e li'e do
li'u
ni'o
ko'e ca lo mu'e tirna di'u ku du'e re'u jai gau tolcando fai lo ctebi
.i
ri'a .ei lo nu lo moklu cu culno lo spatrsasa farlu bo pezli kei
lo voksa la'u li no cu se tirna
.i ku'i
mi ba zi lo nu viska lo zu'o go'e cu jimpe fi le valsi
.i ko'e za'o to'e sinma mi
gi'e cusku lu ko catra li'u noi pa mei se bacru
.i
mi noi pi so'a mei senva joi cikna ku'o
sa'ei .zbur. jai gau ke tunta je pagre fai lo cmalu dakfu lo po'e ko'e
ni'o
pe'i mi ca ji'a lo nu go'i ku de'a sanji
.i
ca lo mu'e du'e re'u viska lo vanbi kei
ko'e pu za co'u vasxu va'o lo za'i skori rinju
.i
le pilda flira ni'a se cpana lo stici solgu'i to'o lo spatrtake joi
ckunrsugi denmi tsani
.i
mi joi gi jai gau rinju fai lo klaku voksa
gi jai gau to'e rinju je vikmi lo morsi xadni skori
.i ce'o
sei sa'a ze'i smaji se'u
.i ce'o mi mo
.i
lo nu go'i po'o zo'u mi claxu lo bapli ji'a be lo nu cusku
.i
ru'a mi ro roi claxu lo bapli be lo nu .uo co'a morsi
.i
lo nu lo cmalu dakfu gau tunta fa'a lo galxe
.e lo nu xadni plipe mo'i ne'i lo cmana jamfu cmala'u
.e mu'a nai lo vrici drata ji'a
cu te troci
.i ku'i
mi go co'a na je pu'o morsi gi'e me ti jmive
gi .ei to'e jgira lo nu go'i
sei sa'a jikseicni cisma
.i
lo cinmo ruble no'u mi zo'u
la'a lo prami je kecti mutce censa po'u la .kanzeon. ji'a co'u sidju
pacna
.i ku'i
mi poi catra ko'e ku'o
mi poi .oi bai se gletu lo zekri lebna zo'u
pau sai mo .ei
.i pau sai mi
sei sa'a ze'i smaji se'u
mi
sei sa'a ze'i smaji se'u
sei sa'a suksa je carmi ke klaku sance
ni'o ni'o
lisri se pi'o lo pruxi bo ve cusku je ninmu moklu fi le morsi pruxi
ni'o
sei sa'a ze'i smaji se'u
le zekri lebna goi ko'a noi ba'o bai gletu le mi speni'u goi ko'e ku'o
pu ki ku joi gi ti zutse
gi ko'e co'a vrici cnidju
.i
.ei mi na'e ka'e bacru
.i ji'a
lo xadni ku ce lo ckunrsugi genja cu se bakfu
.i ku'i
mi ca'o la'e de'u fi ko'e so'i roi kanla cusku
.i tu'e
ko'e ko'oi tu'a lo se cusku be ko'a na krici
.i
ro da poi ko'a cusku ke'a zo'u ko'e ko'oi lo du'u da jitfa ku jinvi
sei sa'a ze'i smaji se'u
tu'u
.i
mi lo nu fi la'e di'u tavla ku djica
.i ku'i
ko'e noi za'a badri ku'o
joi gi lo spatrsasa farlu bo pezli cu zutse
gi fa'a lo tuple cidni cu tai'i .djit. catlu
.i za'a ju'a
fo la'e di'u fe lo du'u ko'e lo ko'a valsi ku tinju'i cu jinvi
.i
mi se ja'e gi jilra gi se xadni co tolcando
.i ku'i
ko'a da ce'o de ca'o to'e juxre ciksi
.i lu
pa mei po'o ku'i nu lo skapi co xadni pu co'i to'e jinsa
.i ja'e bo .ei do le spenau co'a na'e panpi
.i .e'u nai do le di'u spenau ba ranji speni
.i ku'i .e'u do mi co'a speni .ai pei
.i jo'a mi do prami
.i se mu'i sai bo co'i zukte lo se darsi
li'u
sei sa'a ze'i smaji se'u
.i
ko'a noi ro mai darsi ku'o di'u do'a nai co'a cusku
ni'o
sei te cusku be de'u bei ko'a
ko'e noi za'a vindu se pluka
mo'i ga'u jai gau muvdu fai lo flira
.i
ca nai la'e di'u mi ko'e poi se du'i melbi nau ca ze'e pu no roi viska
.i ku'i
ko'e poi melbi
zi'e noi ca'u ke'a me mi poi ca'a skori rinju
cu spuda ko'a ma
.i
mi noi ku'i mo'i zei zvati bu'u lo bi'i zei munje ku'o
ro roi ku go lo te spuda be fi ko'e cu morji gi lo ka ce'u xebni cinmo
cu carmi
.i ju'o
ko'e cusku
sei sa'a ze'i smaji se'u
lu ja'o ko mi mo'i fa'a da .a'u cu'i se kansa li'u
sei sa'a ze'u smaji se'u
ni'o
lo zekri po ko'e za'u mei
.i
lo nu go'e po'o da'i na rau mei krinu lo nu ne'i lo vi manku mi ca'a
dunku traji
.i ku'i
ko'e noi za'a senva pe'a ku'o
ca lo mu'e se jgari ko'a fo lo xance gi'e co'a klama mo'i ze'o lo spati
denmi kei
ge co'a suksa pilda gi tu'a mi pe bu'u lo ckunrsugi genja ku degja'o
.i lu
ko catra le va prenu
.i ganai ri jmive gi mi do na'e ka'e kansa
li'u
sei sa'a ze'i smaji se'u
.i
ko'e noi za'a jai fenki pe'a ku'o di'u so'i roi krixa cusku
.i lu
ko catra le va prenu
li'u
sei sa'a ze'i smaji se'u
.i
le di'u valsi noi vlile tcima pe'a ku'o
nau ca ji'a ku mo'i fa'a lo vu manku loldi
co'a jai bai ke sraji je fatne brife bo farlu fai mi
.i xu pau nai
su'o roi ku do'a nai lo valsi co se xebni be se du'i de'u pa'o lo moklu
be lo'e prenu pu'i se bacru
.i xu pau nai
su'o roi ku do'a nai lo valsi co se dapma be se du'i de'u pa'o lo kerlo
be lo'e prenu pu'i se tirna
.i xu pau nai
su'o roi ku do'a nai
sei sa'a ze'i smaji se'u
sei sa'a suksa ke carvi carmi ke'e pe'a ckasu bo cmila
.i
ca lo mu'e tirna le de'u valsi kei
ko'a ji'a sai co'a pilda
.i lu
ko catra le va prenu
li'u
sei sa'a ze'i smaji se'u
.i
ko'e joi gi di'u ca'o krixa cusku gi ko'a fo lo birka ku tsali jgari
.i
ko'a ko'e joi gi tai'i .djit. ca'o catlu gi zo go'i na .e nai lu na
go'i li'u .e no da spuda
.i
sei sa'a ze'i smaji se'u
ca'o ja pu'o lo mu'e sanji la'e di'u kei
ko'e mo'i fa'a lo cpana be lo spatrtake farlu bo pezli
cu pa po'o mei bo se tikpa je se falgau
sei sa'a re re'u ke carvi carmi ke'e pe'a ckasu bo cmila
.i
ko'a smaji bo kucysimgau be lo'i re birka be'o ce'o se kanla be fa'a lo
mi tarmi
.i lu
gau do mo le va ninmu
.i catra je'i sidju
.i .e'a spuda fi lo zu'o mo'i ni'a stedu tolcando
.i catra xu
li'u
sei sa'a ze'i smaji se'u
.i mi mu'i le di'u valsi ku po'o ji'a fraxu .ai ko'a lo zekri
sei sa'a re re'u ze'u smaji se'u
ni'o
ko'e ca'o lo nu mi .ai cu'i pu'o jdice ku
co'i ja pu'o lo nu vo'a pa da krixa ku
fa'a lo spati denmi condi zi co'a bajra
.i
ko'a ji'a zi fa'a plipe
.i ku'i za'a
la'e di'u na'e rinka lo nu po'o ji'a sai jgari lo taxfu tubnu
.i
mi noi pe'a jitfa ganse ku'o lo di'u jvinu ca'o viska po'o
ni'o
ko'a
ba'o lo nu ko'e rivbi cliva ku
ce'o gi lebna lo barda dakfu .e lo bagyce'a jo'u celga'a
gi gasnu co katna sedi'o pa po'o da lo mi skori
.i lu
ca ku tcini mi
li'u
sei sa'a ze'i smaji se'u
.i
mi morji lo du'u ko'a ca lo mu'e canci ze'o lo spati denmi kei di'u
mliba'u
.i
ro se cliva cu smaji
.i na'i
za'o ku da ci'o klaku
.i
mi ca'o lo nu gau to'e rinju lo skori cu ci'oi .djit. tirna jundi
.i ku'i .ua bu'o
le de'u voksa cu me mi sevzi klaku voksa pei
sei sa'a ci re'u ze'u smaji se'u
ni'o
mi mo'i to'o lo ckunrsugi genja ku lo mi tatpi xadni ku .a'i zei rajgau
.i
ca'u mi lo poi ko'e ni'a cliva ke'a ku'o cmalu dakfu pa mei cu jai
gusni
.i
mi ri jgari fi lo xance gi'e pa mei tungau lo mi cutne
.i
da poi ciblu panci bliku ku'o zo'i lo mi moklu ne'i mo'i ga'u klama
.i ku'i
lo ka dunku cu ba'e no mei
.i ku'i
joi gi lo cutne co'a lenku
gi lo vanbi co'a za'u mei tai'i .cin. smaji
.i .ua
xo pau nai mei ni smaji
.i
mo'i zo'i lo vi cmana ctino spati bo denmi tsani
lo cmalu cipni pa po'o mei cu ji'a na'e ke sanga klama
.i ku'i
bu'u lo ckunrsugi ja spatrtake jipno
lo jikseicni solri bo gusni cu tolcando
.i
lo solri gusni
sei sa'a ze'i smaji se'u
cu ji'a milxe zenba lo ka kandi
.i
sei sa'a ze'i smaji se'u
ji'a lo ckunrsugi ja spatrtake co'u se viska
.i
mi bu'u ta ca'o vreta je ca bo se vanbi be lo condi ka smaji
ni'o ca la'e di'u
da noi smaji cadzu ku'o zo'i mi klama
.i
mi troci lo nu viska fa'a la'e di'u
.i ku'i
se va'o mi ba da lo kandi manku ca'o culno
.i
da zo'u
sei sa'a ze'i smaji se'u
da fi lo na'e viska xance fe lo cutne cmalu bo dakfu ku to'e setca
jgari
.i ca bo
ne'i lo mi moklu lo ciblu co flecu za'u re'u co'a se culno
.i ze'e ba bo
mi mo'i fa'a lo bi'i zei munje manku ba'o jinru
ge'e
fe'o
ni'o ni'o ni'o
vlaste
ni'o
bi'i zei munje
.i lo bi'i zei munje cu munje fi lo budjo .i je bu'u ra lo morsi poi
pu'o za'u re'u jbena cu zvati
to
la .takexir. pa mai re mai
toi
ni'o
la .binzur.
.i la .binzur. du la'o sy Piṇḍola Bharadvāja sy noi budjo censa
to
lo se fraxu pa mai
toi
ni'o
.i lo blanrkonu cu xekri se mau lo blanrxanada
to
lo se fraxu pa mai .i
la .masag. re mai ci mai
toi
ni'o
.i lo blanrxanada cu skari tai lo'e xrula be la'o ly Commelina communis
ly
to
lo tricu katna se jibri pa mai .i
la .masag. re mai
toi
ni'o
.i lo bukprmuci cu caxno bukpu fi'o te zbasu lo cilta be la'o ly
Boehmeria nivea ly pi'o lo'e ninmu te zu'e lo nu rivbi tu'a lo cinki
kei ta'i lo nu vo'a ru'u dandu lo mapkrtcime lo korbi
to
lo litru jdaca'i pa mai .i
la .tajomar. re mai
toi
ni'o
ci'oi
.i zo ci'oi po'e la'o gy COI2 gy cipra cmavo gi'e tcita lo cmevla ja se
sitna be se pi'o zo zoi ja ve skicu le du'u sinxa le du'u ma kau sance
pe'a lo se cinmo
to
la .tajomar. pa mai .i
la .takexir. re mai
toi
ni'o
.i lo cipnrtaka cu du la'o ly Accipitridae ly
to
lo se fraxu pa mai
toi
ni'o
.i lo ckunrsugi cu du la'o ly Cryptomeria japonica ly
to
lo tricu katna se jibri pa mai re mai ci mai .i
la .tajomar. vo mai mu mai xa mai ze mai bi mai so mai pa no mai pa pa
mai .i
la .masag. pa re mai pa ci mai .i
la .takexir. pa vo mai pa mu mai pa xa mai pa ze mai pa bi mai
toi
ni'o
.i lo crekrsuikanu cu creka se ku'u lo gugdejupu be ca lo no'u la
.xeian. cedra be co'i li ze so vo bi'o pa pa so re
to
lo tricu katna se jibri pa mai .i
lo se fraxu re mai .i
la .masag. ci mai vo mai mu mai
toi
ni'o
ctetcika
.i lo pa moi ctetcika cu du lo tcika be fa li ji'i pa so bi'o ji'i re
pa
to
lo se fraxu pa mai
toi
ni'o
.i pa gutcrki cu mitre li ji'i pi no ci no ci .i lo se fanva na se
pagbu be lo se fanva be fu zo li'o no'u lo'u vo no su'i le'u .i ku'i lo
di'u nu vimcu sei lo xirma rajycla cu te tavla cu tcaci lo pu banjupunu
.i se ni'i bo lo xirma ni rajycla cu mitre li su'e ji'i pa pi ci ci
to
lo litru jdaca'i pa mai
toi
ni'o
.i pa gutcrtco cu mitre li ji'i pa no so
to
lo tricu katna se jibri pa mai .i
la .tajomar. re mai
toi
ni'o
ki'ai
.i zo ki'ai po'e la'o gy COI2 gy cipra cmavo gi'e tcita lo cmevla ja se
sitna be se pi'o zo zoi ja ve skicu le du'u sinxa le du'u ma kau se
krixa
to
lo se fraxu pa mai
toi
ni'o
ko'oi
.i zo ko'oi po'e la'o gy UI6 gy cipra cmavo gi'e tcita lo se cusku le
du'u la'e vo'e te minde ja se cpedu ja se curmi ja se pacna ja se stidi
ja se djica ja se bilga
to
la .tajomar. pa mai re mai ci mai vo mai .i
la .takexir. mu mai xa mai
toi
ni'o
le morsi pruxi
.i le morsi pruxi cu du la .la .takexir.
to
la .takexir. pa mai
toi
ni'o
.i lo mapkrtcime cu ganra mapku la'o ly Carex ly pi'o lo'e ninmu se
ku'u lo gugdejupu be ca lo no'u la .xeian. cedra be co'i li ze so vo
bi'o pa pa so re
to
la .tajomar. pa mai
toi
ni'o
.i lo mapkrxeboci cu mapku pi'o lo'e nanmu se ku'u lo gugdejupu be ca
lo no'u la .xeian. cedra be co'i li ze so vo bi'o pa pa so re
to
lo tricu katna se jibri pa mai
toi
ni'o
.i lo nuknrsuxo cu skari tai lo'e cinta be fi la'o ly Caesalpinioideae
ly bei va'o lo jikca
to
lo tricu katna se jibri pa mai
toi
ni'o
pilda
.i zo pilda nalmorsi gismu gi'e se smuni lo za'i lo flira cu ciblu
claxu skari
to
la .masag. pa mai .i
la .takexir. re mai ci mai
toi
ni'o
pruxi bo ve cusku je ninmu
.i lu lo pruxi bo ve cusku je ninmu li'u se smuni lo ninmu je ve cusku
be fo lo pruxi
to
la .takexir. pa mai
toi
ni'o
sa'ei
.i zo sa'ei po'e la'o gy COI2 gy cipra cmavo gi'e tcita lo cmevla ja se
sitna be se pi'o zo zoi ja ve skicu le du'u sinxa le du'u ma kau sance
to
la .masag. pa mai
toi
ni'o
se fraxu
.i lo se fraxu cu zekri prenu gi'e se fraxu te zu'e lo nu gau lo pulji
vo'a sidju fi lo nu facki fi lo drata zekri
to
lo se fraxu pa mai
toi
ni'o
.i lo spatrsasa cu du la'o ly Sasa ly noi ke'a se jutsi fi la'o ly
Bambusoideae ly zi'e poi lo stani be ke'a ru'i se vasru lo pilka .i ko
viska lo pixra .i lo spatrsasa lo spatrtake cu frica lo se jutsi gi'e
ku'i simsa lo tarmi .i se ki'u bo lo nu da jutsi ma kau cu so'o roi se
srera
to
la .masag. pa mai .i
la .takexir. re mai
toi
ni'o
.i lo spatrtake to pixra toi cu du la'o ly Arundinarieae ly noi tricu
me la'o ly Bambusoideae ly gi'e xabju lo glare milxe foldi
sei tu'a la'o ly Arundinarieae ly bu'u la'o zoi
to
lo tricu katna se jibri pa mai re mai ci mai .i
la .tajomar. vo mai mu mai xa mai ze mai .i
la .masag. bi mai so mai .i
la .takexir. pa no mai pa pa mai pa re mai
toi
ni'o
.i lo srasrsusuki du la'o ly Miscanthus sinensis ly
to
lo se fraxu pa mai
toi
ni'o
tai'i
.i zo tai'i po'e la'o gy COI2 gy cipra cmavo gi'e tcita lo cmevla ja se
sitna be se pi'o zo zoi ja ve skicu le du'u sinxa le du'u ma kau sance
pe'a lo tcini ja fasnu
to
lo tricu katna se jibri pa mai .i
la .tajomar. re mai .i
la .masag. ci mai vo mai .i
la .takexir. mu mai xa mai ze mai
toi
ni'o
.i lo tricrxotci cu du la'o ly Melia azedarach ly noi fi'o te tcaci lo
purci ku ge sombo ke'a lo canko be lo sfasa dinju gi ke'a gau se dandu
lo stedu be lo zekri prenu be'o noi sepli lo drata pagbu
to
la .tajomar. pa mai
toi
ni'o
xirma sfani
.i lo xirma sfani cu sfani la'o ly Oestridae ly
to
lo tricu katna se jibri pa mai
toi
ni'o
.i lo za'i zirprxagi senta cu za'i dasni lo zirpu .e lo kandi te tai lo
senta
to
lo litru jdaca'i pa mai
toi
ni'o ni'o ni'o
notci lo se fanva
lo fanva
.i la .iabunonak. to to'e canci ca li pa so re re bau lo banjupunu toi
po'u lo se fanva be fu la'e lu lo nenri be lo spati denmi li'u
cu cfika fi la .akutagaun.riunosuk. to jmive co'i li pa bi so re bi'o
pa so re ze toi
gi'e te finti lo skina po'u la .racoumon. to to'e canci ca li pa so mu
no toi fi la .kurosaun.akir. to jmiva co'i li pa so pa no bi'o pa so so
bi toi
gi'e ka'e se tcidu fi la .aozor.bunk.
fa'o